ROXAS CITY – Tuman ang kalipay nga nabatyagan ni Lt. Commander Marly Llorito- Martir, tumandok sang Jamindan, Capiz matapos nakuha ang duha ka mga bulawan nga medalya sa shooting competition sa nagapadayon nga 30th SouthEast Asian (SEA) Games 2019.
Sa exclusive interview sang Bombo Radyo kay Martir, ginpahayag sini nga ginpreparahan niya ang nasambit nga kompetisyon pinaagi sa paghanas sang maayo sa bulig sang iya bana nga nagaserbe sini nga coach .
Ginakabig ni Martir nga dako nga bugal ang iya nadag-an nga duha ka bulawan nga medalya, bangud ginadala sini ang pangalan sang Pilipinas.
Dako man ang nabulig sa iya ang pagpangamuyo sang iloy, nga wala ginkalimtan nga ipahanumdum sa iya nga magpangamuyo kag magsalig lamang sa Ginoo.
Matandaan nga nagsugod sa pag-entra si Martir sa mga shooting competition lokal ukon international sang tuig 2004, kun sa diin nakakuha ini sang silver medal sa SEA Games 2005.
Nahibaluan nga isa ka katapo sang Philippine Navy si Martir kag kaupod niya sa trabaho ang iya bana nga nagaserbe sini nga coach.
