ROXAS CITY -Kasubong nga nagalutaw pa sa panganod ang pamatyagan sang Capizeña topnocher sa bag-o lamang nagguwa nga resulta sang 2019 Nursing Licensure Examination.
Sa exclusive interview sang Bombo Radyo kay Almira Louise Olete Hinsoy sang Barangay Bilao, Sapian, Capiz, ginpahayag sini nga indi pa ini makapati sang ginsugiran sang ila manunudlo sa West Visayas State University sa Iloilo nga siya ang nag Top 1 sa nasambit nga pasinawan sa diin gintsekyar pa sini sa website ang resulta.
Matapos nga makumpirma nga siya gid man ang nagpanguna sa 5mil 059 ka mga nakapasar sa pasinawan sa bilog nga Pilipinas, naghibi ini sa tuman nga kalipay kag ginpasalamatan ang Diyos nga amo ang nangin alagyan sang iya kadalag-an.
Ginpasalamatan man sini ang iya ginikanan nga naghatag sang bug-os nga suporta sa iya.
Aminado man si Hinsoy nga indi nangin madali ang iya inagihan agud lamang malab-ot ang iya ginapahamtangan sa karon.
Indi naman bag-o sa iya ang pagtulun-an sang nursing students, bangud pila sa mga malapit nga himata ang yara sa medical profession nga isa man sa mga nag-impluwensiya sa iya agud magkuha sang kurso nga nursing.
Magluwas pa nga childhood dream na sini nga mangin isa ka nurse sa pila ka adlaw.
Sadto pa ginapatihan na ni Hinsoy nga kinahanglan sa ila propesyon nga may tagipusoon para sa mga nagabalatian, bangud pinaagi sa passion, mas mangin dedikado pa sa iya trabaho ang isa ka nurse.
Samtang ginpangamuyo sini nga malakip sa Top 10, apang wala naghuna huna nga masobra pa sa iya ginpangamuyo ang ginhatag sa iya.
Sa karon plano ni Hinsoy nga magtrabaho sa provincial hospital agud ma-practice ang iya propesyon kag makabulig sa pag-atipan sa mga pasyente.
Nahibaluan nga kalakip si Hinsoy sa 12 ka nursing graduates sang West Visayas State University nga nakasulod sa Top 10 sang nasambit nga pasinawan sa diin siya ang nag Top 1.
Indi malipod nga naggraduar bilang Cum Laude sa College of Nursing sa WVSU si Hinsoy.
