ROXAS CITY – Tuman ang pagpasalamat ni Capiznon Director Gary Torrenueva Tabanera matapos nga ginpasidunggan ini bilang Best Director sa Pista ng Pelikulang Pilipino 2020 ukon PPP4.
Sa interview kay Tabanera sa Good Morning Philippines program nga wala sini ginaekspektar nga siya ang mangin Best Director sa ila pelikula nga may tig-ulo nga “Binakol sa Dahon”.
Ini bangud madamo sang mga film director ang nagpasakop man kun sa diin nagikan pa ang iban sa Luzon, Visayas kag Mindanao.
Suno kay Tabanera nga ang nasambit nga pelikula ang una na nalakip sa Cinermarya Short Film Festival 2019 matapos nga nakakuha sang garantiya sa idalom sang Film Development Council of the Philippines, Department of Interior and Local Government (DILG), kag Philippine Council for Women.
Ginpahayag sang nasambit nga direktor nga indi man nangin mahapos ang ila nga pagpasakop sa amo nga patag bangud nagalab-ot sa masobra 100 ka mga nanari-sari nga mga pelikula ang nagpasakop.
Samtang, nagapasalamat naman si Tabanera sa bug-os nga production team nga natigayon nga mangin madinalag-on ang ila nga kabudlay kag sa mga tawo nga nagsuporta kag naglantaw sang ila pelikula.
Nagpanugyan naman ini sa mga aspiring directors nga indi madulaan sang paglaom kag padayon lamang sa handum.
Nagpasalig naman ini nga sa masunod nga tuig nga liwat sa gihapon sila magapasakop kag magahimo naman sang panibag-o nga pelikula.
