ROXAS CITY – “Nangin instrumento ang ining Capiztahan 2023 agud mag-unite ukon mag-ugyon ang tanan nga mga Capisnon”
Ini ang ginpahayag ni Governor Fredenil ‘Oto’Castro sang mainterview sang Bombo Radyo.
Suno diri, sa sini nga kahiwatan diri niya napamatud-an ang “One Capiz” bangud nag-ugyon ang 17 tanan ka munisipalidad kag gobyerno probinsyal agud makahatag sang kasadya kag kalingawan sa mga tawo subong nga Capiztahan.
Gintuad pa ni Castro, nga nangin madinalag-an ang Capiztahan 2023 bangud sa partisipasyon sang tagsa isa kag indi lang sang isa ka tawo.
Mahibaluan nga subong nga gab-i nagtakup na ang masobra 2 ka semana nga selebrasyon sang Capiztahan 2023.
Kadungan sang pagtakup amu ang Pyromusical Show nga ginhiwat sa Villareal Stadium, Roxas City kun sa diin nagdugok ang mga magpamilya, mag-abyan, magkarelasyon kag madamo pa agud saksihan ang katapusan nga aktibidad subong nga Capiztahan.
Ginasiguro naman ni Castro, nga patilaw pa lang ini kag lauman ang mas manami kag mas exciting nga Capiztahan sa masunod nga tuig.
