Nagsabat si Senate Minority Leader Alan Peter Cayetano sa pahayag ni Senador Panfilo ‘Ping’ Lacson nga may mga ghost projects kag anomalous flood control infrastructure sa syudad sang Taguig.
Sa iya Facebook livestream, gin-akusahan ni Cayetano si Lacson sang demolition job, trial by publicity kag witch hunt bangud sa mga alegasyon nga naga-angut sa iya sa mga kwestyonable nga proyekto sa syudad.
Ginpahayag ni Cayetano nga bilang isa ka public official, handa siya nga atubangon ang mga alegasyon, apang suno sa iya, indi patas nga ipatungod sa iya ang tanan nga proyekto kag titulo sang mga kadutaan sa Taguig, lakip na ang mga bahin sang Laguna Lake nga ginapahayag gina-reclaim kag ginasakop sang syudad.
Gin-athag ni Cayetano nga wala siya sang kaakig kay Lacson kag handa ini nga sabton ang mga alegasyon sa nagakaigo nga forum.
Samtang suno kay Lacson, ginsumite na sa Ombudsman ang tanan nga mga ebidensya nga natipon sang iya talatapan may kaangtanan sa mga proyekto sa Taguig.
