ROXAS CITY – Ginahatagan na lamang sang tobtob sa Marso 31 ang mga CEOs sang mga investment companies sa probinsiya sang Capiz para mabalik ang investments sang mga investors.
Ini ang nangin resulta sang ginpatigayon nga committee hearing sang Committee of the Whole sang Sangguniang Panlalawigan sa diin nangin dinapit nga bisita sanday Atty. Jeremiah Sargado-Asst.Regional Director sang NBI Region 6; Atty. Russel Ildesa sang Securities and Exchange Commission (Region-6) via zoom, Butch Biclar-President sang Philippine Bankers of the Philippines- Capiz chapter; Dale Bernas sang Filipino-Chinese Chamber of Commerce kag Atty. Jojie Earl Del Castillo-President sang Integrated Bar of the Philippine Capiz chapter.
Ginpahayag ni Board Member Jonathan ‘’Sonny’’ Besa chairman sang Committee on Finance and Appropriation nga naghinyo sila sa NBI sang ceasfire sa mga CEOs nga magapatigayon sang pay-out sa investments sang mga investors.
Apang pananglitan nga matapos ang Marso 31 kag indi mabalik ang kuwarta sang sang mga investors, diri na kag magahimo sang legal nga aksyon batuk sa mga CEOs.
Sa bahin naman sang Sangguniang Panlalawigan, kabahin sang legislative intervention nga ila pagahimoon amo ang pagtukod sang multi agency task force/council nga magatutuk sa posible magtanyag sang kasubong sini nga investment sa palaabuton sa mga pumuluyo subongman ang ginaproponer ni Board Member Thea Faith Reyes nga pagpasar sang resolution nga magahinyo sa duha ka mga kongresista nga mag-alokar sang pondo agud magamit sa paghimo sang legal nga tikang sang SEC sa posible mangin biktima sang kasubong sini nga operasyon.
Samtang ginpasiguro man sang Bangko Sentral ng Pilipinas kag bankers association nga wala sang daku nga epekto sa ekonomiya ukon banking system sa probinsiya ang kapaslawan nga makabaton sang pay-out ang mga investors.
Nagpasalig man ang IBP Capiz chapter pinaagi kay Atty. del Castillo nga magabulig sila sa mga pigado nga investors sa pagfile sang judicial affidavit.
Nahibaluan nga may 17 na ka mga complainants nga nagfile sang ila affidavit sa NBI-Region 6 batuk kay Patroceño Don Chiyuto matapos nga wala ginbalik ang ila investment nga nagalab-ot sa P28 milyones.
Samtang 34 naman ang complainants nga nagreklamo batuk kay Junelyn Gregorio nga yara karon sa kostodiya sang NBI sa diin P961 million naman nga investments ang wala sini mabalik.
