Ginganyat sang bag-o nga Philippine National Police (PNP) Chief PGen. Nicolas Torre III si anay Presidential Spokesperson Atty. Harry Roque nga bilang abogado nagsiling nga dapat niya atubangon ang iya mga kaso kag magbalik sa Pilipinas.
Ginpahayag ni Torre nga indi na ini mga kaso nga pwede dal-on sa dalanon agud magpatigayon sang pagtililipon ukon rally kag dapat magpasakop siya sa korte kag maghatag na lang sang argumento angot sa iya kaso.
Nagapati man si Torre nga mas makapaayo kun i-surrender ni Roque ang iya kaugalingon subong man ang 49 ka iban pa nga imbolbado sa sini nga kaso may kaangtanan sa paglapta sang iligal nga Philippine Offshore Gaming Operations (POGO) sa pungsod.
Samtang, suno sa bag-o nga lider sang PNP, ang pagpakig-angot sang gobyerno sang Pilipinas sa International Criminal Police Organization (Interpol) ang isa lamang sa mga mekanismo nga ila magamit para sa posible nga pagpauli ni Roque pabalik sa pungsod.
Isa man ini ka bug-os nga pamaagi sang gobyerno kun sa diin ginhatagan importansya sang hepe ang trabaho sang Department of Foreign Affairs (DFA) sa pagkanselar sang mga pasaporte ni Roque kag sang iban pa nga mga akusado agud nga indi sila makabiyahe sang hilway sa guwa sang Pilipinas.
Sa karon, 2 sa 51 ka mga akusado ang nadakpan kag yara sa kustodiya sang Criminal Investigation and Detection Group samtang 49 ka iban pa ang ginapangita bangud sang kahilabtanan sa iligal nga operasyon sang Lucky South 99 kag nagapangatubang sang kaso, ang iban diri lakip na si Roque ang nagapangatubang sang kaso nga qualified human trafficking nga indi bailable sa Philippine law.
