City Coun. Celino, wala sang kalain sang buot sa pag-veto sang iya ginaduso nga ‘Videoke Ordinance’

ROXAS CITY – Wala sang nakit-an nga problema si City Councilor Jericho Angel Celino sa pag-veto ni Roxas City Mayor Ronnie Dadivas sa iya ginaduso nga ‘Videoke Ordinance’.

Suno sa konsehal nga normal lamang ini bangud may yara gidman sang ‘check and balance’ sa pagpapasar sang isa ka ordinansa gani wala siya sang kalain sang buot.

Bukas man ini suno sa iya sa anuman nga ideya nga luyag idugang sang alkalde sa amo nga ordinansa.

Aminado si Celino nga nagpangusisa ini sa iya mga kaupdanan sa konseho kun ano ang rason sang pag-veto sang amo nga ordinansa bangud ‘unanimously’ approved man ini sang mga miyembro sang Sangguniang Panlungsod.

Nag-agi suno sa iya sa maid-id nga pagdebate ang amo nga ordinansa kag ginplantsa sang mga katapo sang konseho agud masabat ang problema sa ‘noise pollution’ sa siyudad.

Sa iya pagpangusisa suno sa konsehal, may pila lamang ka mga terminolohiya nga luyag mabayluhan sa amo nga ordinansa kag may minimal lamang nga pagabag-uhon.

Matapos ang pila ka mga pagbag-o, liwat ini nga magaagi sa 1^st, 2^nd, kag 3^rd reading sa konseho.

Mahibaluan nga katuyuan sang amo nga ordinansa amo ang ma-regulate ang videoke kag pagpatunog sang mga sound system sa tion sang kagab-ihon.

Diri pagadumilian ang pag-videoke ukon pagpatunog sang mga sound system humalin alas 10 sa gab-i tubtob alas 5 sang aga.

Sa nasambit nga ordinansa may yara sang multa ang mga magalapas kun sa diin magabayad sang P3,000 kag iga-impound ang videoke sa 1^st  offense, P4,000 kag iga-impound ang videoke sa 2^nd offense kag P5,000 kag iga-impound ang videoke sa 3^rd offense.