ROXAS CITY – Nagahinyo sang deferment ukon pagpaiway sa implementasyon sa Motor Vehicle Inspection System (MVIS) sang Land Transportation Office (LTO) kag Department of Transportation (DOTr) ang mga motorista sa syudad sang Roxas.
Ginpahayag ni City Councilor Atty. Gary Potato, chairman sang Committee on Public Utility sang Sangguniang Panlungsod sa ginpatigayon nga Committee Hearing sang Committee of the Whole nga ginpangunahan sang Committee on Public Utilities, pila ka mga concern nga ginpalab-ot sa ila talatapan ang nangin sentro sang hinun-anon kaupod ang mga katapo sang Land Transporation Office (LTO)-Roxas, OIC Regional Director sang LTO-Region 6 kag manager sang Panay Quality Motor System Incorporated.
Ginklaro man sa sinapol nga makaisa lamang magabayad ang mga motorista sa pag-inspeksyon sang ila salakyan kag pananglitan nga indi makapasar ang ila mga salakyan sa inspection ukon test, mahimo sila makabalik kag indi na kinahanglan nga liwat magbayad.
Nagapati ang opisyal nga kinahanglan ipaiway ini nga pagsulundan kag ipaidalum sa pag-review ang Implementing Rules and Regulation (IRR) antes ipatuman, bangud suno kay Potatlo nga mas maayo nga unahon kag siguraduhon nga 90 porsyento nga yara sa maayo nga kondisyon ang ginasiling pinaka-importante nga parte sang salakyan agud malikawan ang aksidente sa dalanon.
Ginpanindugan pa sang konsehal kun road-worthiness ang paga-estoryahan nga amo ang ginaduso sang nasambit nga pagsulundan, dapat unahon nga ipaidalum sa MVIS ang mga dalagkuan nga truck bangud sila ang imbolbado sa mga fatal accidents sa dalanon.
Magluwas diri, may ikasarang ang tag-iya sang mga truck bangud negosyo ang katuyuan sang ila pagbiyahe gani mentenado ini.
Apang nahibaluan nga ang rason nga gin-una ang mga salakyan kumpara sa mga truk bangud ang kagamitan nga ginagamit ang naga-cater lamang sa mga salakyan kag wala pa sang kapitalista nga nagtukod sang establisemento nga sarang maga-cater sa dalagkuan nga trak.
Bangud diri nagpapasar sang resolution ang Sangguniang Panlungsod nga naga-apelar kag nagganyat sa DOTr nga ipaiway ang implementasyon sang Motor Vehicle Inspection System samtang ginapaidalum sa pagreview ang IRR.
Magapadala man sila sang sulat sa national office sang DOTr, LTO-Regional Office 6 kag LTO-Roxas agud mapalab-ot ang sentimiyento sang mga motorista nga nagapamatuk sa nasambit nga programa sang ahensiya.
