ROXAS CITY – Naintindihan ni City Councilor Atty. Gary Potato, ang hibubun-ot kag sitwasyon sang mga tricycle drivers and operators sa syudad angut sa pagtaas sang produktong petrolyo sa bilog nga pungsod.
Sa interview sang Bombo Radyo kay Atty. Potato, chairman on transportation ang public utilities, ginsiling sini nga iya pagahibaluon ang rason sang medyo may kamahalan nga presyo sang gatong diri sa probinsya ikumparar sa iban nga lugar diri sa western visayas.
Ini matapos nga nakaabot sa iya igtalupangod nga mas barato ang presyo sang gatong sa iban nga probinsya.
Nahibaluan nga ang kontrol sa presyo sang produktong petrolyo amu ang nagagikan sa Energy Regulatory Commission (ERC).
Sa pihak nga bahin, ginsiling sang konsehal, nga wala pa sa gihapon matapos ang ginapatigayon nga screening sang lokal nga gobyerno sang syudad angut sa mga bakante nga city number.
Apang, posible nga antes matapos ang tuig, mahibaluan na ang mga pasado sa nangin screening agud mahimo na nga maka-apply ang mga luyag makaangkon sang prangkisa.
Ginklaro sini nga kun sakto ang numero sang mga naga-apply sa bakante nga city number, wala na sang matabo nga ‘pa raffle.’
Nahibaluan nga kada-tatlo ka-tuig ang pagrenew sang franchise diri sa syudad sang Roxas, samtang kada-tuig, gina-renew ang Mayor’s permit sini.
