ROXAS CITY -Gin-athag ni City Councilor Albert Gregory Potato nga wala ginapilit ang publiko nga magdala sang kaugalingon nga utensils sa mga food establishments nga nagatanyag sang “dine-in” sa syudad sang Roxas.
Ginhimo ini nga pahayag ni Potato kasunod sang negatibo nga komento sang publiko angut sa ginpapasar nga resolusyon sang Sangguniang Panlungsod nga nagaganyat sa publiko nga magdala sang kaugalingon nga utensils sa mga kalan-an sa syudad.
Gintadlong ni Potato nga resolusyon pa gid lamang ini ukon written sentiment sang konseho kag indi obligado ang publiko nga magsunod.
Suno pa kay Potato nga wala sang penalidad kag multa sa mga wala nagasunod nga indibidwal bangud indi pa ini dalayon nga layi.
Wala naman sang kalain nga buot si Potato sa mga netizens nga naghatag sang komento bangud naintindihan sini nga posible nga wala nahangpan sang publiko ang luyag ipalab-ut sang konseho.
Suno kay Potato nga dako ang benepisyo sa publiko nga may yara sang available nga mga disposable nga mga utensils nga magamit sang mga kustomer nga nagaduda sa sanitation sang isa ka kalan-an.
Samtang ginkompirmar ni Potato nga plano nga magapapasar sang ordinansa ang konseho sang syudad nga naga-require sa mga food establishments nga magprovide sang mga disposable utensils sa mga naga kaon nga kustomer.
Apang samtang wala pa ini napapasar, ginpanindugan ni Potato nga mas maayo nga magdala sang kaugalingon nga utensils ang mga naga dine-in customers sa mga food establishment agud malikawan ang paglapta sang covid-19 disease.
