ROXAS CITY – Gindeklarar sang Bureau of Fisheries and Aquatic Resources (BFAR) ang tatlo ka bulan nga closed-fishing season sa Visayan Sea humalin Nobyembre 15, sini nga tuig tubtob Pebrero 15, sa masunod nga tuig 2020.
Ini ang ginpahayag ni Provincial Fisheries Officer Edwin Javier sang mainterview sang Bombo Radyo.
Base sa Fisheries Administrative Order 167-3 nga ginpapanaog sang BFAR Regional Office 6, hugot nga ginadumilian ang pagpanakop sang mga isda nga Sardines, Herring kag Mackerel sa kadagatan nga sakop sang Visayas.
Ini agud nga mahatagan sang panahon ang amo nga klase sang isda nga makapangitlog kaangay sang “lupoy,” “silinyasi,” linatsay” ukon “manansi” sa porsyon sang Visayan Sea.
Kinahanglan nga estrikto ini nga mapatuman suno kay Javier bangud ang sinuman nga madakpan ang may nagakaigo nga penalidad nga paga-atubangon.
Ang madakpan ang mahimo mapriso sang anom ka bulan tubtob anum ka tuig kag may multa nga P6, 000.
Mahimo man makanselar ang permits sang sinuman nga madakpan nga nagalapas sa pagsulundan.
