ROXAS CITY, CAPIZ- Ginpatigayon ang isa ka mapinuslanon nga programa sang damlag lang sa Bureau of Jail Management and Penology (BJMP)-Roxas City sang mga propesor gikan sa College of Agriculture & Fisheries sang Capiz State University-Pontevedra Campus, sa diin ginpasakupan sang mga Persons Deprived of Liberty (PDLs) ang paghananas sa produksyon sang cash crops kadungan sang isa ka literacy program nga katuyuan nga pasangkaron ang edukasyon kag pangabuy-anan sang mga yara sa sulod sang presuhan.
Sa pagpanguna sang Bureau of Jail Management and Penology (BJMP)-Roxas City, ang programa ang kabahin sang mas malapad nga katuyuan nga hatagan sang kahigayunan ang mga PDLs nga mag-angkon sang produktibo nga aktibidad samtang sila ang yara sa sulod sang presuhan. Ang nasambit nga aktibidad ang may duha ka mga nagapanguna nga bahin, sa diin amo ang ito pagtanom sang mga high-value crops kaangay sang otan, herbal plants, kag iban pa nga komersyal nga pananom; kag ang paghanas sa pagbasa, pagsulat, kag basic education.
Sa interview sang Bombo Radyo kay Dr. Eden Alam, Associate Professor III sang CapSU-Pontevedra Campus, iya ginpahayag nga katuyuan sang programa ang indi lamang maghatag sang pangabuy-anan kundi ang pagpataas man saang dignidad kag pag-laum sang mga yara sa presuhan.
Suno kay Alam, ang mga maani halin sa cash crops ang mahimo nga ibaligya sa lokal nga merkado ukon sa mga kooperatiba, nga magahatag sang income sa mga PDLs nga mahimo taguon bilang savings ukon panggastos ila personal nga kinahanglanon.
Pahayag pa nya, ang literacy program ang kabahin man sang rehabilitasyon, kun sa diin ginatudluan ang mga participants sang pagbasa, pagsulat, kag matematika, agud nga mas mangin handa sila sa liwat nga pagbalik sa sosyudad.
Nagpasalamat man ang natungdan sa pila ka mga opisyal kag pribado nga sektor sa pagpahayag sang suporta sa nasambit nga inisyatibo, nga gintawag nila nga tikang padulong sa tawhanon kag mapinuslanon nga reporma sa sulod sang mga presuhan.
Interviewed by Bombo Francis Biñas ang Bombo Sunnie Mae Batencila
