ROXAS CITY – Boluntaryo nga nagsungka sa talapatan sang Traffic Management Unit (TMU) ang driver sang colorum traysikol nga nagsukot sang P500 nga pleta para sa pagkarga sini sang tiles nagikan sa Barangay Lawaan padulong sa Rizal Street.
Ini ang ginkumpirmar ni Mr. Gonzalo Andrada, pinuno sang TMU sang mainterview sang Bombo Radyo.
Suno kay Andrada, wala sang rason nga magpick-up sang pasahero kag magbiyahe ang indi na paghingadlan nga drayber bangud wala ini sang lisensya kag indi rehistrado nga magbiyahe sa syudad.
Bangud sini, magabayad sang kapin P2, 500 ang driver bilang penalidad sa paglapas sang pagsulundan sang TMU.
Ginsiling man ni Andrada, nga matuod nga nagsukot sang sobra ang driver apang indi ini mahimo nga mapenalty-han bangud colorum ini.
Sa bahin naman sang traysikol driver, ginsiling sini nga ginsukot niya ang pasahero sang nasambit nga kantidad bangud mabug-at ang produkto nga ginkarga sa iya behikulo.
Ginturn-over man sang driver ang nasambit nga traysikol kag gilayon man nga nakuha matapos nabayaran ang multa.
Nagapanawagan naman si Andrada sa mga pasahero, nga indi na magsakay sa mga colorum tricycle bangud indi na sakup sang ila layi ang indi rehistrado nga tricycle.
