Ginpasalamatan ni Commission on Elections (Comelec) Chairman George Erwin Garcia ang komprehensibo nga reporting sang Bombo Radyo Philippines, halin sa preparasyon tubtob sa pagpatigayon sang eleksyon.
Suno kay Garcia, daku ang nabulig sang Bombo Radyo sa pagpalapnag sang impormasyon.
Suno sa iya, indi masarangan sang mga poll bodies nga mag-isahanon sa pagtuman sang tanan nila nga katungdanan, gani daku nga bagay nga ang mga polling stations malapad nga available agud malab-ot ang aton mga kasimanwa sa malayo nga mga lugar.
Para sa pinuno sang poll body, mas nangin aware kag alerto ang publiko sa mga hitabo sa komisyon bangud sa regular nga updates nga ginahatag sang network.
Gin-ako ni Garcia nga madamo pa sang luyag nga bag-uhon sa proseso sang eleksyon, apang nalipay siya nga nasuguran na ang pila sa iya mga handom.
Nagalakip ini sang temprano nga pagboto para sa mga tigulang, nagamasakit, kag mga nagabusong.
Apang kun posible pa suno sa iya, magahingyo ini sa mga mamalidha nga ipaagi sa lehislatura ang early voting para sa mga yara sa vulnerable sector agud nga ma-implementar ini tubtob sa masunod nga eleksyon.
