ROXAS CITY – Handa nga magpatunga si Capiz 1st District Representative Emmanuel “Tawi” Billones Sr. sa provincial board kag sa executive department sang kapitolyo-probinsyal agud nga maresolbar ang tubtob subong wala pa maaprubahan nga Annual Investment Plan para sa tuig 2020.
Ini ang pahayag ni Billones sang mainterview sang Bombo Radyo Roxas.
Suno kay Billones nga handa siya nga magbulig kun kinahanglan ang iya nga bulig agud masolusyunan ang problema sa AIP bangud apektado na diri ang tanan ilabi na ang mga proyekto nga ginapatuman sang gobyerno-probinsiyal.
Samtang ginpahayag sini nga normal lamang sa provincial board nga usisaon ang mga natukiban nga duplikasyon sa mga proyekto bangud ang mga board members ang nagaserbe nga ‘watch dog’ sang gobyerno-probinsyal.
Kinahanglan lamang suno kay Billones nga makahinala ang provincial board kag executive department agud masabat ang mga ginapahayag duplikasyon sang proyekto sa idalom sang AIP.
Pabor naman si Billones nga magre-convene ang Provincial Development Council (PDC) agud matalakay liwat ang mga natukiban nga problema kag mahatagan na ini sang solusyon.
Kinahangalan lamang suno diri nga magkonsulta sa mga alkalde sa mga kabanwahanan agud mahibaluan ang mga proyekto nga kinahanglanon sa ila nga lugar.
Gin-athag naman ni Billones nga wala sang kamatuoran ang mga nagalapta nga istorya nga may kaangtanan si anay DILG Secretary Mar Roxas sa wala pa pagpapasar sang AIP para sa tuig 2020.
