Nagpa-andam si Davao City 1st District Rep. Paolo Duterte sa iya mga kaupod nga mamalidha sa House of Representatives batok sa pagsuporta sa posible nga bag-o nga impeachment complaint batok sa iya utod nga si Vice President Sara Duterte, nga ginapaabot nga ipasa sa Pebrero 2026.
Suno sa kongresista, ang pagpadayon sang impeachment amo lang ang gusto sang pila nga may kontrol sa pondo kag impluwensya, kag indi matuod nga tingog sang pumuluyo.
Gindugang pa niya nga sa isa ka representative democracy, ang desisyon sang mga mamalidha dapat nakabase sa panindugan sang ila ginapangatubang nga constituents kag indi sa politika kag patronage.
Samtang, ginpahayag ni Cavite Rep. Kiko Barzaga nga indi siya magsuporta sang bisan ano nga impeachment complaint, bisan pa man nagasugot siya nga dapat imbestigahan ang paggamit sang confidential funds sang Bise Presidente.
Matandaan nga una na nga gindeklarar sang Korte Suprema nga unconstitutional ang una nga impeachment complaint batok kay VP Sara sang Pebrero 2025 bangud sa paglapas sang one-year ban santo sa 1987 Constitution.
Sa subong, naka-pending pa gihapon ang motion for reconsideration sang Kamara.
Nahibaluan nga una na nga naglutaw ang isyu sang bag-o nga impeachment complaint batok sa Bise Presidente bangud magatapos na sa masunod nga bulan ang one-year ban kag mahimo nga isulod diri ang mga bag-o nga alegasyon sang detainee nga si Ramil Madriaga, nga nagsiling nga siya amo ang bagman sang bise presidente kag ginpondohan sang Philippine Offshore Gaming Operators (POGOs) kag drug lords ang kampanya sang Vice President sang 2022 Presidential elections.
