ROXAS CITY – Suportado sang Liberal Party sa probinsiya sang Capiz ang kandidatura ni Pilar SB member Mitchelle John Patricio nga nagapadalagan bilang Presidente sa Philippine Councilor’s League Capiz chapter election sa Lunes nga adlaw.
Ginpahayag ni Capiz 1st District Representative Emmanuel Billones Sr., nga nakigkita sa iya si anay Pilar Mayor Gideon Ike Patricio kag anak nga si SB member Patricio kag ginhinyo ang suporta sang partido.
Sa bahin naman sang kasumpong ni Patricio nga si Pilar Number 1 SB member Angela Joy Alfaro Tupaz, ginpahayag ni Billones nga wala ini nagpangayo sang suporta sang partido apang naglisensiya lamang sa iya nga pahanugutan ini nga makapadalagan bilang presidente sang PCL.
Gilayon man nga ginpalab-ot sang kongresista ang ila na-estoryahan sang mag-amay nga Patricio sa lider sang LP sa diin nadesisyunan sang pamunuan sang LP nga suportahan ang kandidatura ni Patricio.
Natalana man nga ipatawag ni Congressman Billones ang mga lideres sang LP sa kabanwahanan kalakip sa syudad agud ipalab-ot ang impormasyon nga nakadesisyon na ang pamunuan nga suportahan ang kandidatura ni Patricio sa PCL election.
Nagalaum ini nga respetuhon kag pagasundon sang ila kaupdanan sa LP ang desisyon sang partido.
Ginpabugal man ni Billones nga may nagakaigo nga numero sa gihapon ang LP nga magatib-ong sa kandidatura ni Patricio.
