ROXAS CITY -Ginpatpat ni Capiz First District Representative Emmanuel Tawi Billones Sr. ang panindugan sini angut sa HouseBill No. 6875 ukon Anti-Terror Bill nga ginpapasar sa Third Reading sang House of Representatives.
Ginpahayag ni Congressman Billones nga nagboto ini sang “Yes with reservation”bangud magkatuhay ang panindugan sini sa nasambit nga hagna.
Suno kay Billones nga nagapabor ini sa hagna bangud nakita sini nga dako ang mabulig sini pananglitan nga mangin laye na ini sa ulihi ilabi na sa pagtapna sang mga rebelde nga padayon nga nagasabwag sang kalakasan kontra sa gobyerno.
Gindugang pa sini nga ang pagtapna sang ginakabig mga “legal front” sang mga komunista nga grupo ang isa sa mga tinutuyo sang nasambit nga hagna.
Apang gin-athag ni Billones nga madamo nga probisyon sini ang wala sini ginapaboran.
Suno sa opisyal nga wala sini naluyagan ang warrantless arrest, pagpresu sa sulod sang 20 diyas sa mga ginasuspetsahan mga terorista kag iban pa.
Mahibaluan nga ginpapasar sa third and final reading sang House of Representative ang House Bill No. 6875 ukon Anti-terror Bill matapos nga nakaangkon sang majority vote sa mga kongresista sa diin 173 ang nagboto sang “YES”, 31 ang nagboto sang “NO” kag 29 naman ang nag-abstain.
