ROXAS CITY – Indi pa mapat-od sa karon kun pagaaprubahan sang gobyerno sang siyudad ang ginahinyo nga construction permit sang G. Arabia Platinum Construction and Development Company nga isa sa ginapangayo nga rekisitos sang City Engineering Office agud mapadayon ang ginpauntat nga road construction project sa San Roque Street, Roxas City.
Suno kay City Engineer Noel Lamenares nga antes ang Mayo 5, nakasumiter na sang request ang nasambit nga construction company agud mahatagan sang construction permit kag ini ang gintugyan sa talatapan sang alkalde sang siyudad.
Una naman nga ginkompirmar sang City Engineering Office nga nakumpleto na sang nasambit nga contractor ang tanan nga mga rekisitos nga gina-require sa City Ordinance No. 46-2016 para sa application sang construction permit kag ginahulat na lamang kun aprubahan sang Sangguniang Panlungsod.
Matandaan nga ginpauntat sang City Engineer’s Office ang road construction sa San Roque Street kun sa diin nagaserbi nga contractor ang nasambit nga construction company bangud sa ginapahayag kapaslawan nga magsumiter sang tag-iya sang construction permit kag certificate of completion sa mga nakaligad nga proyekto.
Apang matigdas naman nga ginpanindugan sang tag-iya sang amo nga construction company nga si Gin Arabia nga wala siya sang ihibalo natuhoy sa amo nga rekisitos nga kinahanglan masumiter.
Suno diri nga wala man ini ginhambalan antes pa man nagsugod ang konstruksiyon sang nasambit nga proyekto rason nga nagapati siya nga gina-ipit lamang siya sang gobyerno sang siyudad.
