Patay ang isa ka construction worker matapos nga ginbuno sang kaupod sini sa ubra sa Barangay Aglalana, Dumarao, Capiz.
Ginkilala ang biktima kay alyas ‘Adolfo’, 38-anyos; samtang ang suspek naman ang ginkilala kay alyas ‘Rexon’, 44-anyos kag lunsay mga residente sang Barangay Tumalalud, Mambusao, Capiz.
Sa nakuha nga impormasyon sang Bombo Radyo kay PCPT. Tobias Garfin, hepe sang Dumarao Municipal Police Station, ginapahayag nga nagainom-inom ang biktima kag ang nasambit nga suspetsado kaupod sang ila sini nga mga kaupdanan, nga may nag luntad nga indi pag-intindihanay sa tunga sang suspek kag kaupod sini nga construction worker.
Apang, nag-una na tulog ang biktima, sa ila sini nga bunk house kag nasal-an lamang ni Rexon nga si Adolfo ang iya sini nga nakabais. Hinali na lang nga ginbuno sang suspek ang biktima kag naigo ini sa dughan nga porsyon sang lawas sini.
Gilayon naman nga gindala ang biktima sa ospital apang ginbawian ini sang hulam nga kabuhi suno sa nag-atendir nga doktor. Samtang, nadakpan naman ang amo nga suspek sa nagresponde nga kapulisan sa lugar.
Sa karon, nagapabilin sa kustodiya sang Dumarao Municipal Police Station ang suspetsado para sa nagakaigo nga disposisyon.
