ROXAS CITY – Dead on arrival sa Dumarao Medicare Center ang 31-anyos nga construction worker matapos nga ginbuno sang 40-anyos nga kaupod sa trabaho sa Barangay Cubi, Dumarao, Capiz.
Ginkilala ang biktima kay Francis Catuiran Depetillo, samtang ang suspek ang ginkilala kay Renante Canonigo Dayang, lunsay mga construction workers sa syudad sang Iloilo kag residente sang nasambit nga barangay.
Sandig sa inisyal nga imbestigasyon sang mga katapo sang Dumarao MPS, kagab-i sang Marso 5, nagpadulong ang hubog nga biktima sa tiyangge sang suspek.
Ginpahayag nga gin-atubang ini sang asawa sang suspek apang nagluntad ang indi pag-intindihanay kag ginaalegar ginbunggo sang biktima ang amu nga babayi.
Naguwa ang suspek sa ila balay nga yara sa impluwensiya sang makahulubog nga ilimnon, kag ginbuno ang biktima gamit ang kutsilyo.
Naigo ini sa natuo nga porsyon sang li-og nga gintunaan sang iya kamatayon.
Nagaguwa sa inisyal nga imbestigasyon sang mga kapulisan nga daan nga hiligut-anon ang motibo sang krimen.
Natigayon man nga madakpan ang suspek matapos ang ginpatigayon nga operasyon sang mga kapulisan.
