ROXAS CITY – Patay ang construction worker kag pilason ang kaupod sini matapos bun-on sang ila man kaupod sa trabaho sa Poblacion, Tapaz, Capiz.
Ginkilala ang napatay nga si Jade Cervas 28-anyos sang Barangay San Roque, Tapaz samtang pilason si Elvin Jimenez sang Barangay Minan, Tapaz.
Nagaguwa sa inisyal nga imbestigasyon sang Tapaz PNP nga magkaupod ang duha ka mga biktima kag ang suspek nga si Ariel Unog sang Barangay Roxas 8, Tapaz nga nag-inum apang sang nagpauli na sila nga tatlo sakay sa motorsiklo nga ginamaneho ni Cervas, naghinyo ini nga magapangihi.
Matapos nga ginpundo ni Cervas ang motorsiklo, hinali nga naggabot sang kutsilyo ang suspek kasunod ang pagbuno kay Cervas sa tiyan kag dughan.
Gintuyo man nga bun-on ni Unog si Jimenez, apang iya nasagang ang kutsilyo sang iya nga kamot.
Gilayon nga gindala sa ospital si Cervas, apang gindeklara nga dead on arrival sang doktor samtang madasig naman nga nagpalagyo si Unog matapos ang krimen.
