ROXAS CITY – Dismayado ang mga construction workers sang ginatukod nga ospital sa Barangay Jaena Norte, Jamindan matapos nga kulang ang nababaton nila nga sweldo.
Sa exclusive interview sang Bombo Radyo kay alyas “Boy”, masobra isa ka tuig na ang iya pag- antos sa kulang nga sweldo nga iya ginabaton kaupod ang 30 ka iban pa.
Kung sumahon ang kabug-usan suno diri, ang iya sulukton sa pamunuan ginabulubanta nga mas o menus P50,000 bangud nagasweldo ini sang P500 kada adlaw apang masami katunga lamang ukon mas gamay pa ang iya nababaton, samtang nakadepende naman sa ila trabaho ang kuluhaon sang iban niya nga kaupdanan.
Napakig-angutan naman nila ang ila foreman kag ginapahayag nga wala pa makabayad ang pamunuan sang DPWH -6 sa ila, rason nga indi ini sila mabayaran sang bilog.
Dugang pa suno diri nga personal nga kuwarta sang contractor ang ginapasweldo sa ila para bisan papaano may mapauli sila sa ila pamilya.
Nagalaom naman ang mga ini nga mapasabat ang DPWH region 6 para magpaathag bangud naga- antos kag apektado ang ila pamilya sa ginabaton nga kulang nga sweldo.
Bukas naman ang talatapan sang Bombo Radyo para sa sabat sang mga natungdan.
