Isa ka epektibo nga pamaagi sa pagpadamu sang ani ang paggamit sang conventional kag organic farming para sa mga mangunguma.
Sa interview sang Bombo Radyo sanday Dr. Eden Alam, associate Professor III sang Capiz state University-Pontevedra Campus kag John Rey Delos Santos, Department of Science and Technology (DOST) Graduate, ila ginpahayag nga ang paggamit sang sini nga mga pamaagi sa pagpanguma ang may daku nga bulig sa ani sang mga pananum.
Suno kay Dr. Alam, ang paggamit sang conventional farming ang isa ka epektibo nga pamaagi kun sa diin nagagamit sang siyensya sa pagmanipula sang mga genitically modified organism (GMO) agud mangin matimsog kag madamu ang ani sang isa ka pananum.
Pahayag naman ni Delos Santos, mas epektibo gihapon ang paggamit sang organic farming ukon tradisyunal nga pagpananum bangud bisan indi parehas sang conventional farming ang kadamu sang ani, mas kalidad naman ang produkto bangud wala sang ginagamit nga synthetic nga abono kag mga pesticide.
Dugang pa sang mga natungdan, kinahanglan may husto nga ihibalo antes gamiton ang ini nga mga klase sang farming method agud malikawan ang balatian sa mga tawo mangin sa duta nga pagatamnan.
