ROXAS CITY – Pilason ang court stenographer sang RTC Branch 19 sang Roxas City Hall of Justice matapos tiruhon sa sulod sang salakyan sa Villa Alegria Subdivision, Barangay Punta Tabuc, Roxas City.
Nakilala ang biktima nga si Jhonel Arches 42-anyos sang Vista del Rio sa Barangay Libas, Roxas City nga nag-angkon sang pilas sa paa kag tiil.
Sa interview sang Bombo Radyo Roxas kay Superintendent Dante Tayco, hepe sang Roxas City PNP, nagapatigayon sila sang madalum nga imbestigasyon para matumod ang suspek kag motibo sa pagtiro sa biktima.
Ginpadulungan naman sang mga imbestigador ang ginluntaran sang insedente para matsekyar kung may CCTV camera sa lugar nga makabulig sa ila nga imbestigasyon.
Sa karon suno kay Tayco nga indi pa ma-estorya ang biktima nga yara sa gihapon sa state of shock matapos ang insedente.
Apang ba-se sa inisyal nga imbestigasyon sang pulisya nga may intensyon nga patyon sang nagaisahanon nga suspek ang biktima bangud makatatlo ka beses niya nga ginpalukpan ang salakyan sa diin nawasak ang windshield sang Nissan Sentra na salakyan.
