ROXAS CITY – May posibilidad nga nagakabudlayan na sa ila sitwasyon ang terorista nga grupo nga CPP-NPA matapos ang nagluntad nga encounter sang ila masobra 10 ka mga miyembro kag kasuldaduhan sang 4th infantry battalion sang Agosto 15 sa boundary sang Calinog Iloilo kag Tapaz.
Ini ang ginsiling ni Cpt. Kim Apitong, tagpamaba sang 12IB/3ID Phil. Army sang ma-interview sang Bombo Radyo.
Ginkumpirmar sini nga may narekober ang katapo sang kasuldaduhan nga isa ka Ak47 nga armas-luthang, isa ka N79 nga grenade launcher kag iban pa nga kagamitan nga ginapanag-iyahan sang rebelde nga grupo matapos nagpatigayon sila sang combat ops nga nagresulta sa encounter, sa bulig man sang isa ka concerned citizen nga nagtimbre sa ila nga may nasiplatan nga armado nga grupo sa lugar sang insidente.
Sa masunod nga adlaw, nagpatigayon sila sang hot pursuit kag ginsundan ang mga tulo sang dugo kag diri nakita nila ang mga kinutkutan nga ginatawag food and arms cache sang CPP-NPA sa bahin sang Sitio Agbalante, Barangay Tacayan banwa sang Tapaz, malapit lang sa lugar nga ginluntaran sang encounter.
Ang nasambit nga cache amu ang ginataguan sang mga pagkaon kag armas sang terorista kag ginakadtuan pananglitan tuman na nila ini nga kinahanglan.
Bangud diri, ba-se sa assessment sang kasuldaduhan, wala na sang may mapangayuan sang bulig, nagakabudlay na, kag wala na nagabulig ang pumuluyo sa terorista nga grupo.
Nakuha sa food and arms cache ang 3 ka M16 rifles kag yara na ang mga ini sa kustodiya sang 12th infantry battalion.
Sa karon, nagapadayon ang ila combat operations kag monitoring sa lugar.
Gindayaw man ni Capt. Apitong ang pagpanikasog sang militar partikular ang kasuldaduhan bangud sa wala untat nga pagtugis sa mga terorista.
Mensahe sini sa mga terorista nga grupo nga magsungka na samtang may oras pa.
