Natalana nga magapagwa sang subpoena ang Criminal Investigation and Detection Group batok kay Senator Ronald Bato dela Rosa may kaangtanan sa imbestigasyon sa ginaalegar extrajudicial killings (EJK) sa Davao City.
Sa isa ka press briefing subong nga adlaw, gin-athag ni DILG Secretary Jonvic Remulla nga indi ini mangin arrest warrant kundi isa lamang ka subpoena, nga natalana nga i-file buwas nga adlaw.
Suno kay Remulla, may kaangtanan ini sa imbestigasyon sang House Quad Committee sa panahon nga nagserbe si Dela Rosa bilang hepe sang Davao City Police Office kag sang ulihi nangin police chief sa rehiyon sang Davao.
Dugang pa sang opisyal, kabahin ini sang nagapadayon nga imbestigasyon sa mga alegasyon sang extrajudicial killings sa tion sang pagserbisyo ni Dela Rosa sa pwersa sang kapulisan.
