Gindala sa ospital ang contractor nga si Pacifico “Curlee” Discaya II agud magpa-opera sang iya abaga.
Suno kay Senate Secretary Mark Llandro “Dong” Mendoza, gintugotan ni Senate Blue Ribbon Committee chairman Panfilo Lacson ang hingyo sang kampo ni Discaya nga mapaidalom ini sa medikal nga operasyon.
Ginpahayag man nga posible magapabilin siya sa ospital sa sulod sang apat tubtob pito ka adlaw para sa iya pag-ayo.
Bilang parte sang proseso, nakaposas ang kamot ni Discaya sang ginpagwa siya halin sa Senado padulong sa ospital.
Ginpabutyag sang Senate Secretary nga hugot nga pagabantayan sang Senate Security si Discaya samtang yara ini sa ospital.
Ginpaandaman man nga istrikto ang pagdumala sa mga bisita, kag limitado lamang halin alas-8 sang aga tubtob alas-5 sang hapon.
Madumduman nga halin pa sang Setyembre 2025, nakakulong na sa Senado si Discaya matapos siya ma-cite in contempt sang Senate Blue Ribbon Committee bangud sa imbestigasyon sa anomalya sang mga flood control projects.
