Ginsiguro sang Department of Agriculture nga ang suhestiyon sang National Price Coordinating Council (NPCC) nga magdeklarar sang food emergency ang para lamang sa rice kag indi sa tanan nga basic commodities sa merkado.
Sa nangin pahayag ni DA Assistant Secretary for High Valued Crops, Sagip Saka and Intellectual Property Deputy Spokesperson Atty. Joycel Panlilio, ginpasiguro sini nga ang food emergency amo agud ma-release na ang mga stocks sa mga warehouses sang National Food Authority (NFA) kag indi naman maapektuhan ang pila ka mga common goods nga nababakal sang merkado sa mga balaklan.
Dugang pa sini, may ikasarang ang NPCC nga mag-anunsyo sang food security emergency sa iban pa nga mga basic goods kun may makita nga iregularidad kasubong sang illegal price manipulation ukon extraordinary increase sa mga presyo sini.
Samtang, padayon naman nga nagahulat ang bahin sang DA para sa pag-abot sang resolution tuhoy sa deklarasyon sang food emergency for rice.
Kun nabaton na ini sang tiglikom, pagatun-an pa ini liwat apang kasubong sa nangin pahayag ni Agriculture Secretary Francisco Tiu Laurel Jr., posible ang pagdeklarar sini antes matapos ang bulan sang Enero ilabi kun nakita pa ang kinahanglanon sa deklarasyon sini.
Sa karon, padayon naman nga ginalauman ang pagdeklarar sang food emergency for rice samtang subong naman nga adlaw nakatalana nga magasugod ang pagpahamtang sang maximum suggested retailed price (MSRP) ang ahensya sa mga presyo sang imported nga bugas nga yara sa ₱58.
