Gin-anunsyo sang Department of Agriculture (DA) nga sa Marso 31, ang maximum suggested retail price (MSRP) sang imported premium rice ang igapanubo sa P45/kilo bangud sa padayon nga pagnubo sang global prices.
Suno kay Agriculture Secretary Francisco Tiu Laurel Jr., nagnubo sang mas ukon menos P19 kada kilo ang retail price sang imported rice ipaanggid sa nauna nga presyo sini antes pa man gin-implementar ang MSRP sadtong Enero.
Ang pagpanubo sang ila fixed price gikan sa P49/kilo ang kabahin sa gihapon sang inisyatibo sang departamento nga mangin barato ang mga produkto sa mga merkado, ilabi na ang mga basic commodities kaangay sang bugas.
Samtang, ang pagpatuman sang MSRP ang resulta sang konsultasyon sang mga stakeholders sa industriya agud masiguro nga ang pagpanubo sini sa presyo ang indi makaapekto sa ila benta kag subong man agud nga indi makompromiso ang seguridad sa pagkaon sa pungsod.
