ROXAS CITY – Dead on arrival na sang ginpadangat sa ospital ang 43-anyos nga babayi matapos ginaalegar ginluthang-patay sang iya kaugalingon nga gumangkon sa Sitio Pudian, Barangay Tuburan, Maayon, Capiz kahapon nga adlaw, Agosto 24.
Ginkilala ang biktima kay Cherry Deocampo, wala sang asawa, samtang ang suspek ang ginkilala kay Ariel Deocampo, 23-anyos, gumangkon sang biktima kag lunsay residente sang nasambit nga banwa.
Sa panaysayon ni Vilma Deocampo, utod sang biktima, antes natabo ang insidente updanay pa si Ariel kag Cherry sa iya balay sa Crossing Bangkalo mga alas 11:30 sang aga apang nagluntad ang debate kag ginpabati-batian suno diri ni Cherry ang iya gumangkon nga si Ariel sang malain nga istorya.
Ginsiling sini nga naglakat ang biktima bangud gindul-ong sini ang ila apo sa Sitio Pudian apang sang papuli na kuntani, diri kag ginbanggaan siya sang suspek takna 12:15 sang hapon kag ginaalegar ginluthang makaduwa ka beses kun sa diin wala nag-igo ang isa ka tiro samtang naigo naman sa likod sang biktima ang isa nga gintunaan sang iya patal nga pilas.
Suno naman sa nakasaksi nga si Nelfa Lagdamin, nabatian niya ang isa kalupok nga mahinay kag may nagsinggit “aguy”, pagbalikid niya nakita niya ang suspek nga may kapot nga pusil kag gintiro sini liwat ang biktima.
Ginkumpirmar ni Vilma nga may daan na nga hiligut-anon kag masami nagaluntad ang indi pagintindihanay sa tunga sang duwa rason nga ginalantaw niya ini nga rason sa pagpatay sa iya utod.
Gilayon naman nga nagpalagyo ang suspek nga si Ariel padulong sa suba sa bahin sang Barangay Tuburan kag nagbuligay ang pumuluyo nga madala sa ospital ang biktima nga si Cherry.
Sa karon, padayon nga ginalalip sang kapulisan ang suspek kag yara naman sa isa ka punerarya ang bangkay sang biktima.
