ROXAS CITY – Nagdangup sa Bombo Radyo ang 20-anyos nga dalaga kasunod sang naglapta nga video scandal nga ginaalegar gindalahigan sini.
Sa pagpakig-angut sang Bombo Radyo kay alyas Inday, ginpahayag nga wala ini sang ideya nga gingamit ang iya laragway sa iya account sang ginaalegar babaye nga naka-awat sa facebook sang barkada.
Nakibot na lamang ini sang may nag-chat sa messenger kag ginapamangkot kun siya gid man ang babaye sa nasambit nga sex video nga nagalapta sa karon.
Suno kay alyas Inday nga babaye man ang yara sa likod sini bangud gintawagan pa siya kag nagpangayo sang sorry.
Apang ginpalab-ot sini sa wala ginhingadlan nga babaye nga indi makuha sa sorry ang nangin epekto sini sa iya pagkatawo kag sa iya pamilya nga ginabasol siya sa natabo sa pihak nga indi niya ini kagustuhan kag nadalahig lamang sa away sang abyan kag sang suspek.
Ginaklaro ni alyas Inday nga indi siya ang babaye sa kapin anum ka minuto nga sex video nga ginasiling kuha sa sulod sang sementeryo.
Aminado ang dalaga nga tuman gid ini nga naapektuhan sa diin may tion nga indi siya makakaon bangud sa depresyon nga nabatyagan kag kahuy-anan.
Samtang desidido ang dalaga nga magpangayo sang bulig sa Cyber Crime Division sang PNP agud maaresto ang yara sa likod sini nga insedente.
