ROXAS CITY, CAPIZ- Nag-gutok kag nangin mahinay ang dalagan sang trapiko sa Roxas City, ilabi na sa Barangay Banica kag Barangay Mongpong, kadungan sang pagsug-alaw sang tigkalalag 2025.
Sa interview sang Bombo Radyo kay Mr. Gonzalo Andrada, Head sang Traffic Management Unit (TMU) Roxas City, iya ginpahayag nga indi lamang mga behikulo ang nagtuga sang pagginutok sa karsadahon kundi pati man ang mga tawo.
Suno kay Gonzalo, sa pihak sang nagaginutok nga mga behikulo kag mga tawo, may mga motorist man sa gihapon nga nagpasaway.
Pahayag nya, may yara sang nagsabat pa sa mga katapo sang TMU kag nagapakatig-a sa ila nga paghatag sang direksyon.
Nahibaluan nga wala pa sang may nadakpan nga mga nagbayolar sa layi-trapiko sang Nobyembre 1 bangud sa tuman nga kasaku-on, apang, nagpahanumdom ang pamunuan nga magapangdakop gid sila sa mga pasaway nag nagabayolar sa pagsulundan.
Apang, sa pihak sang amo nga hitabo, nagapabilin nga matawhay ang sitwasyon sa karsadahon kadungan sang pagsug-alaw sang Tigkalalag 2025.
Nagapanawagan naman ang natungdan sa tanan nga mga motorist nga magsunod sa kun ano man nga layi sang trapiko, agud nga mas mangin matawhay ang dalagan sang tagsa ka mga behikulo kag indi makatuga sang delay sa iban nga mga motorista.
Interviewed by Bombo Sunnie Mae Constantino Batencila
