ROXAS CITY – Ginkabig nga isa ka malain nga damgo sang 17-anyos nga dalagita ang paghimulos sa iya sang stepfather sa isa ka banwa sa probinsiya sang Capiz.
Sa sulod sang tatlo ka tuig, ginhimo nga sex slave sang suspek ang biktima, sa diin una nga ginhimuslan si Alyas Nene ni Alyas Rene sang Septiembre 1, 2016 tobtob bulan sang Pebrero sini nga tuig.
Nahibaluan lamang ang kabastusan nga ginhimo sang suspek sa dalagita matapos nagkaisog si alyas Nene nga magsugid sa iya paryente nga gilayon nagpangayo sang bulig sa mga pulis.
Wala naglaum ang biktima nga sarang siya mahimuslan sang stepfather nga ginkabig sini nga ikaduha nga amay.
Sa karon yara na sa kostodiya sang iya mga himata ang biktima, matapos nagbiya sa ila nga balay.
Natalana nga pasakaan sang panumbungon nga 5 counts of rape kag paglapas sa RA 7610 ukon Anti Child Abuse Law ang suspek..
