Narekober sang Philippine Coast Guard (PCG) ang mga debris sang rocket nga may marka nga People’s Republic of China (PRC) sa baybayon sang Sitio Gunting, Barangay Bonbon, kag Lubang, Looc, Occidental Mindoro sang Agosto 14, 2025.
Suno sa report sang PCG, nakit-an sang isa ka lokal nga mangingisda ang nagalutaw nga mga debris kag gilayon ini nga ginreport sa Philippine National Police-Maritime Group (PNP-MARIG).
Gilayon nga nagpatigayon sang retrieval operation ang Coast Guard Sub-Station (CGSS) Lubang kaupod ang Barangay Binacas kag ang Provincial Disaster Risk Reduction and Management Office (PDRRMO) Lubang Sub-Office.
Ang nasambit nga debris, nga ginapatihan kabahin sang Long March 7A rocket launch sang PRC sang Hulyo 15–17, 2025, nagasukol sang 10 ka tapak ang kalaparon kag 14 ka tapak ang kalabaon, human sa alloy, kag may bandera sang China.
Ginpain na ang mga debris sa Sitio Balaguin, Barangay Maliig para sa nagakaigo nga paghaboy.
Nagpahanumdom ang PCG sa mga mangingisda kag mga pumuluyo sa baybayon nga gilayon nga i-report sa pinakamalapit nga Coast Guard station ang anuman nga makaduluda nga butang nga makita sa dagat.
