ROXAS CITY-Nagapadayon sa karon ang ginapatigayon nga declogging operation sang Department of Public Works and Highways (DPWH) Capiz First Engineering District sa mga barado nga drainage systems sa probinsiya sang Capiz.
Ini ang ginkompirmar Engr. Julius Abela, Chief sang Maintenance and Construction sang DPWH-Capiz First Engineering District sang mainterview sang Bombo Radyo.
Ginpahayag ni Abela nga target sang talatapan nga limpyuhan ang tanan nga mga barado nga drainage systems nga napahamtang sa mga national highways sa premier distrito sang Capiz preparasyon para sa ginalauman nga pagbubu sang ulan.
Diri sa siyudad sang Roxas, ginpahayag ni Abela nga ginsuguran na ang declogging operation sa Barangay Lawaan kag maintenance naman sang mga drainage system sa Barangay Sibaguan.
Aminado si Abela nga madamo sang mga drainage systems nga kinahanglan nga hatagan sang solusyon agud malikawan ang pagbaha sa siyudad sa tion nga magbubu ang mamunog nga ulan.
Isa sa mga problema nga nakita ni Abela, amo ang pagbara sang mga basura sa drainage systems rason nga wala sang lulutsan ang tubig nga ginatunaan sang pagbinaha-baha sa siyudad.
Magluwas diri may pila man ka mga drainage system ang ginpangtambakan sang mga kompaniya nga nagpatindog sang istrukura.
Nagpanawagan man si Abela sa mga LGU sa probinsiya, nga magpatigayon sang kaugalingon nga declogging operation.
Mahibaluan nga ang declogging operation ang kabahin sang regular nga paglimpyo sang talatapan sang ila nga mga bardo nga drainaige systems.
