ROXAS CITY – Ginpakigbahin sang Public Information Officer (PIO) sang Department of Health (DOH)-Capiz ang mga balatian nga posible maangkon sang publiko sa panahon sang El Niño.
Sa interview sang Bombo Radyo kay Mr. Joeffrey Espiritu, balantayan ang duha ka balatian subong nga panahon, amu ang dehydration kag heat injury.
Bangud sa mainit nga panahon, daku ang posibilidad nga maangkon sang pumuluyo ang dehydration bangud sa kakulangan sang tubig nga gina-inom kag heat stroke.
Sa tion nga makulangan sang tubig ang lawas sang isa ka tawo, nagaresulta ini sa malfunction sa body system, gani importante ang pag-inom sang 8 ka baso sang tubig ukon masobra pa sa sulod sang 1 ka adlaw.
Suno kay Espiritu, ang dehydration ang tuman ka peligroso ilabi na sa mga kabataan.
Yari ang mga sintomas kun ang bata ang dehydrated:
– mamala ang bibig kag dila
– wala sang luha nga nagaguwa apisar nagahibi
– lusok ang mata
– kag iritable
Samtang sa mga adult:
– Masami nga pagka-uhaw
– Malaka nga pagpangihi / dark color sang ihi
– Masami ginakapoy kag nagalingin ang ulo
– Indi na mahibaluan kun ano ang nagakahinabo
Ang diarrhea, pagpalanuka, mataas nga lagnat, pagpamalhas sang sobra-sobra ang posible magresulta man sa dehydration.
Gintuad pa ni Espiritu, kun indi matatap gilayon ang dehydration posible magtuga ini sa komplikasyon kaangay sang heat stroke, urinary kag kidney problems, seizure kag hypovolemic shock.
Sa pihak sini, ginasiguro ni Espiritu nga nagapadayon ang ila pagpalapta sang impormasyon kun pano malikawan ang dehydration kag mapalayo sa iban pa nga balatian tuga sang El Niño.
