Nakakuha na ang delegasyon Capiz sang 23 ka mga gold, 16 ka silver kag 17 ka bronze nga may kabug-san nga 56 medals as of March 19 sa nagapadayon nga Western Visayas Regional Athletic Association (WVRAA) Meet 2026.
Sa interview sang Bombo Radyo kay Dr. Roel F. Bermejo, Schools Division Superintendent sang Capiz, iya ginpahayag nga padayon ang ila nga suporta sa mga atleta, coaches kag ginikanan sa probinsya sang Capiz.
Suno kay Bermejo, indi lamang medalya ang ginatutukan kundi pati ang paghulma sang sportsmanship kag disiplina sa mga atleta nga ila madala bisan tapos na ang kompetisyon.
Ginpahayag man sini, nga may ginapatigayon man nga inhouse training bilang kabahin sang preparasyon sang mga atleta agud mas mangin handa sa nagkalain-lain nga hampang.
Ginsiguro man ni Bermejo nga ang pagkaon sang mga atleta ginabase sa standard sang Department of Health agud masiguro ang ila maayo nga lawas kag performance sa tagsa ka event.
Nagpasalamat man ini sa tanan nga mga committee sang WVRAA bangod sa madinalag-on kag organisado nga pagpatigayon sang nasambit nga palaro.
Magakatop naman ang WVRAA sa Marso 23.
