Preparado na ang delegasyon sang Capiz School Division Office para sa palaabuton nga WVRAA 2026.
Sa interview sang Bombo Radyo kay Ms. Yzarda Claudette Ballera, Division Information Officer sang DepEd Capiz Division, iya ginpahayag nga magabyahe ang mga delegasyon sang SDO-Capiz sa March 15 bangud magasugod ang regional meet sa March 17 tubtob 23 nga pagahiwaton sa Passi City.
Suno sa iya, may yara sang total nga 866 nga delegates ang Capiz School Division Office lakip na ang mga athletes, coaches, kag assistant coaches.
Dugang pa niya nga ginaprepare gid sang maayo sang mga coaches kag mga trainers ang mga athletes agud man mapakita ang ila abilidad sa nagkalain-lain nga sports events.
Pahayag pa niya nga madamu man sang mga games ang pagapasakopan sang mga delegates sa palaabuton nga event, lakip na ang badminton, dancesports, football, gymnastics, table tennis, taekwando, volleyball, basketball kag madamu pa sang iban.
Nahibaluan nga may yara sang walo tanan ka mga competing delegations ang magapasakop lakip na ang Guimaras, Capiz, Aklan, Antique, Roxas City, Iloilo City, Passi City, kag Iloilo Province.
Nagpasalamat man ini sa tanan nga mga opisyal sang Capiz Provincial Government sa pagpanguna ni Capiz Governor Fredenil H. Castro sa padayon nga paghatag sang bulig kag suporta sa tanan nga mga delegation sang Capiz School Division Office para sa palaabuton nga WVRAA 2026.
