Ginpakigbahin sang Capiz Sports Coordinator nga wala sang nabalhag nga major incidents sa mga delegado sang Capiz sa nagapadayon nga Western Visayas Regional Athletic Association Meet (2025 WVRAA Meet).
Sa interview sang Bombo Radyo kay Mr. Ronie Retiracion DepEd Capiz Sports Coordinator, ginpahayag sini nga nangin matawhay kag wala sang dalagkuan nga mga insidente nga nahitabo sa nagapadayon nga aktibidad sa Probinsya sang Antique.
Suno kay Retiracion nga sports related ang nangin rason sa mga minor nga insidente nga natabo sa mga delegasyon sang Capiz.
Sa pihak nga bahin ginpahayag man sang Capiz Sports Coordinator nga malabo nga makasulod sa top 3 ang delegasyon sang Capiz bangud tuman ka kusog kag kabakod sang iban nga mga atleta nga nagikan sa iban nga probinsya.
Suno kay Retiracion, apisar nga nagatimakas ang mga atleta sang probinsya nga makakuha sang madamo nga medalya talalupangdon man ang mga kasumpong sini nga wala nagapabaya agud makakuha kag makapauli sang madamo nga medalya.
Mahibaluan nga sa pinakaulihi nga partial and unofficial result sa elementary level nagapanguna ang probinsya sang Negros Occidental nga may yara sang 52 ka bulawan nga medalya, nagapangduha ang Iloilo nga may 42 ka bulawan nga medalya , 8 sa Antique, 5 sa Capiz, 4 naman sa Aklan kag Guimaras.
Samtang sa secondary level naman nagapanguna ang probinsya sang Iloilo nga may 76 ka bulawan nga medalya, Negros Occidental 69 gold medals, Aklan 20 gold medals, Capiz nga may 8 ka bulawan nga medalya, Antique nga may 4 ka gold medals, kag Guimaras nga may 3 ka bulawan nga medalya.
Para naman sa Final and Official Results sa Paragames, Champion ang Iloilo, 1st Runner-up – Negros Occidental, 2nd Runner-up – Aklan, 3rd Runner-up – Antique, 4th Runner-up – Capiz kag 5th Runner-up naman ang Guimaras.
Sa karun, subong amat-amat na nga nagapalauli ang iban nga mga delegado diri sa Probinsya sang Capiz.
