ROXAS CITY – Iga-endorso na sang Dengue Crisis Committee ang pagdeklarar sang ‘dengue outbreak’ sa Capiz bangud sang padayon nga pagtimbuok sang kaso sang nasambit nga balatian sa probinsiya.
Ini ang ginpahayag ni Board Member Esteban Jose Contreras, chairman sang Committee on Health sang Sangguniang Panlalawigan kasunod sang ginpatigayon nga sinapol sang nasambit nga komitiba.
Mahibaluan nga base sa pinaka-ulihi nga datos sang Provincial Health Office (PHO), naglab-ot na sa masobra 2, 000 ang napagkit nga kaso sang dengue sa probinsiya sini nga tuig kun sa diin naglab-ot naman sa 14 ka mga indibidwal ang napatay.
Suno kay Contreras nga nalab-ot naman sang probinsiya ang mga parameters agud magdeklarar sang ‘outbreak’ kalakip diri ang Disease Surveillance Data, Epidemiological, Environmental kag Laboratory Investigation.
Mahibaluan nga ulihi nga nadeklarar ang ‘dengue outbreak’ sa probinsiya sadtong tuig 2010 kag posible nga madeklarar ini liwat sini nga tuig bangud sa padayon nga pagsaka sang kaso sang nasambit nga balatian.
Mahibaluan nga nagsaka sang halos 771% ang kaso sang dengue sa probinsiya kun ikomparar sa kapareho nga period sang nakaligad nga tuig.
