May nakapanglinyada na nga mga aktibidad ang Department of Environment and Natural Resources (DENR) Capiz kadungan sang monthly celebration subong nga Hunyo 2025 nga Philippine Environment Month.
Sa ginpatigayon nga PIA Kapihan Press Conference kaupod ang Department of Environment and Natural Resources (DENR) Capiz, ginpahayag ni Dr. Ernest Federiso, Officer In Charge, Provincial Environment and Natural Resources Officer sang Department of Environment and Natural Resources nga nakapreparar na ang ila nga talatapan para sa patigayunon nga mga nanari-sari nga sahi sang aktibidad may kaangatan sa Philippine Environment Month subong nga bulan.
Dugang pa sini, nag-umpisa na ang pila nila ka mga nakapanglinyada nga aktibidad sang Hunyo 1 sa diin nagpatigayon sila sang tree planting kag coastal cleanup activity sa banwa sang Pilar.
Nahibaluan nga subong nga adlaw sang Hwebes, Hunyo 5, ginasug-alaw ang World Environment Day kag bwas nga adlaw Hunyo 6 tubtob 7 ang Ocean Camp featuring Dalaw turo, sa Hunyo 10 naman amo ang Family Day featuring Larong Pinoy, Pasidungog and ENRA Graduation sa Hunyo 17, Sportsfest and Laro ng Lahi sa Hunyo 18 tubtob 19, sa Hunyo 25 naman ang Arbor Day Tree Growing 2025, kag Luntiang Pasasalamat sa Hunyo 30.
Sa bilog nga bulan sang Hunyo 2025, ginasaulog ang Plastikilig: Hugot para sa Kalikasan at Pag-Ibig.
Tinutuyo sang amo nga mga aktibidad ang hatagan sang ihibalo ang tagsa-tagsa kag ipahanumdom ang tagsa ka mga papel may kaangtanan sa pag-amlig sa dunang manggad. Samtang, nagpalab-ot man sang mensahe si Dr. Federiso nga makig-angot lang sa ila nga talatapan para sa dugang nga detalye may kaangatanan sa mga concerns natuhoy sa pag-amlig sa dunang manggad.
