Magaumpisa na sa pagpanagtag sang P7,000 nga financial assistance ang Department of Agriculture (DA)-Capiz para sa mga kwalipikado nga mga mangunguma sa probinsya umpisa bwas nga adlaw.
Sa interview sang Bombo Radyo kay Engineer Israel Barros, Agricultural Program Coordinating Officer sang Department of Agriculture-Capiz, iya ginpahayag nga pagahiwaton ang pagpanagtag umpisa bwas nga adlaw tubtob Oktubre 10 kaupod ang Landbank of the Philippines kag Department of Social Welfare and Development.
Suno kay Barros, ang mga kwalipikado amo ang mga mangunguma nga may ulumhan nga indi magnubo sa 2 hectares kag naka-rehistro sa Registry System for Basic Sectors and Agriculture (RSBSA).
Ang schedule sa buwas nga adlaw Oktubre 8 ang pagahiwaton sa banwa sang Dumarao, halin alas-8:00 sang aga tubtob ala-1:00 sang hapon kagpagatambungan sang mga mangunguma nagikan sa banwa sang Cuartero, Dao, Dumalag, Dumarao kag Tapaz.
Pag-abot sang Hapon, pagatigayunon naman ang pagpanagtag sa banwa sang Sigma halin ala-1:00 sang hapon tubtob ala-6:00 sang gab-i kun sa diin magatambong ang mga mangunguma sa banwa sang Ivisan, Jamindan, Sapian kag Sigma.
Sa Oktubre 9, sa banwa sang mambusao pagahiwaton ang pagpanagtag maghalin alas-8:00 tubtob alas-10:00 sang aga nga pagatamungan sang mga mangunguma sang nasambit nga banwa.
Sa Oktubre 10, pagahiwaton sa banmwa sanng Panay maghalin alas-8:00 sang aga tubtob ala-5:00 sang hapon nga pagatambungan sang mga mangunguma nagikan sa banwa sang Maayon, Panitan, Panay, Pontevedra, Pilar, President Roxas kag syudad sang Roxas.
Pahayag pa niya, pagpasalamat sa mga mangunguma ang ihatag nga ayudad bangud sa padayon nga pagserbisyo sa pungsod.
Dugang pa sang natungdan, magdala lamang sang valid ID kag Registry System for Basic Sectors and Agriculture (RSBSA) form ang mangunguma sa pagkuha sang ila nga cash assistance.
Interviewed by: Bombo Jessa Mae Delos Santos via Bombohanay sa udto
