Aktibo na karon nga ginamonitor sang Department of Health (DOH) ang trends sang COVID-19 sa tunga sang ginreport nga pagsaka sang kaso sang sini nga balatian sa Southeast Asia.
Sa isa ka pahayag, gin-anunsyo sang DOH nga nagakomunikar sila paagi sa establisado nga mga mekanismo kaangay sang ASEAN, nga nagahatag sang verified nga impormasyon kag dugang nga nagapabaskog sang preparasyon gani wala sang makita nga kabangdanan sang pagkaalarma.
Sa data sang DOH as of May 3, diri sa Pilipinas, nagnubo sa 87% ang numero sang kaso kag napatay bangud sa COVID-19 humalin sang nagligad nga tuig sa diin 1,774 lang ang na-report subong nga tuig ipaanggid sa 14,074 ka kaso sang 2024.
Ginreport man sang ahensya nga yara lang sa 1.13% ang case fatality rate.
Suno sa iya, ang mga bag-o nga uso nagapakita sang gamay nga pagnubo sang mga kaso sa sulod sang nagligad nga tatlo tubtob apat ka semana. Halin sa 71 ka kaso sang Marso 23 tubtub Abril 5 sini nga tuig, nagnubo ini sa 65 ka kaso humalin Abril 6 tubtub 9.
Liwat nga ginahingyo ang publiko nga maghimo sang preventive measures agud maproteksyunan ang ila kaugalingon sa nasambit nga balatian kaangay sang pagsuksok sang facemask sa mga healthcare facilities, pagtiner sa balay kon nagamasakit, pagtabon sang baba kon naga-ubo ukon nagapangatsi, regular nga paghugas sang kamot, kag magpakonsulta sang temprano kun makabatyag sang sintomas.
