Nagpasalig ang Department of Trade and Industry (DTI) nga bantayan ang presyo kag supply sang mga basic goods subong nga tig-ululan kag kalamidad.
Sa interview sang Bombo Radyo Philippines kay DTI Sec Cristina Roque, iya ginpahayag nga humalin sang gindeklarar sang state weather bureau ang pag-umpisa sang tig-ululan, ginabantayan na sang ahensya ang supply sang mga basic goods nga posible maapektuhan sang sunod-sunod nga pag-ulan.
Suno sa iya, kinahanglan nila nga siguraduhon nga makatarunganon gihapon ang ila mga presyo kag indi paggamiton sang mga negosyante ang serye sang ulan bilang balibad agud magpataas sang presyo.
Subong man, sa ginalauman nga pagsulod sang mga bagyo sa pungsod, ginsiling sini nga ang DTI magapadayon sa pagbantay sang mga nagapanguna nga balaklon nga ginabaligya sa mga merkado.
Una nga bantayan ang mga lugar nga posible madeklarar sa idalom sang state of calamity bangud sa mabaskog nga bagyo kag iban pa nga kalamidad.
Una na nga ginkumpirmar sang tiglikom nga wala sang pagsaka sa presyo sang mga basic commodities sa subong, sa pihak sang sunod-sunod nga bigtime oil price hikes. Bisan ang mga canned goods wala man nagpataas sang ila presyo sa pihak sang nauna nga pangabay sang mga manufacturers.
