ROXAS CITY, CAPIZ – Indi komportable ang Department of Education Region VI sa nangin resulta sang 2024 Functional Literacy, Education and Mass Media Survey (FLEMMS) sang Philippine Statistics Authority (PSA).
Sa regional data nagapakita nga siyam sa 10 ka mga indibidwal sa Western Visayas ang basically literate, samtang pito sa 10 ang functionally literate.
Ang rehiyon ang nagapang-walo sa bilog nga Pilipinas sa basic literacy nga may 89.6%, kag nagapang-anum sa functional literacy.
Sa interview sang Bombo Radyo kay Elena Gonzaga, Chief Education Supervisor sang DepEd Region 6, iya ginpahayag nga sa pihak sang nangin resulta, nagapakita sa ila internet assessment nga may yara sang maayo nga performance ang mga estudyante sa rehiyon.
Apang ginakilala man ni Gonzaga ang nangin resulta kag suno sa iya, kinahanglan mangin wake-up call ini para sa Curriculum Implementation Division sang Iloilo agud ma-review kag ma-improve ang ila mga programa.
Ini bangud ang Iloilo amo ang may pinakamanubo nga basic and functional literacy rates sa Western Visayas. Gin-ako man sang natungdan nga wala siya nalipay sa resulta sang survey apang pinaagi sini, makakuha sang insights ang ahensya halin sa external evaluation agud ma-assess ang performance.
