ROXAS CITY, CAPIZ – Preparado na para sa nagahilapit nga pagbalik-eskwela sang mga estudyante subong nga School Year 2025-2026 ang Department of Education-Roxas City.
Sa interview sang Bombo Radyo kay Mr. Renato Ballesteros, PhD., CESO V School Division Superintendent sang DepEd-Roxas City nga magasugod na sa Hunyo 9 ang Brigada Eskwela kag magatakop naman sa Hunyo 13, 2025.
Dugang pa sini, may pila ka mga aktibidad ang patigayunon sa tion mismo sang Brigada Eskwela kun sa diin umpisahan ini sang Caravan kag official kick-off las 8:00 sa aga, Hunyo 9, sa Roxas City School for Philippine Craftsmen, pagasundan sang enrollment, pag-install sang mga community help desks kag iban pa nga mga aktibidad.
Nahibaluan, nga magapatigayon man sang mga monitoring ang amo nga ahensya may kaangtanan sa kahandaan sang tagsa ka mga buluthuan kag manunudlo para sa nagahilapit nga pagbukas sang klase nga natalana naman sa Hunyo 16.
Samtang, mensahe naman ni Ballesteros sa publiko nga maghiliusa sa patigayunon nga Brigada Eskwela para masiguro ang seguridad sang mga kabataan sa ila sini nga pagbalik sa tagsa ka mga buluthuan.
