Gin-anunsyo sang kampo ni anay Presidente Rodrigo Duterte nga handa na sila para sa confirmation of charges hearing sa atubang sang International Criminal Court (ICC) subong nga Lunes sang hapon.
Suno sa iya abogado nga si Atty. Nicholas Kaufman, ang iya depensa magahatag lamang sang opening statement antes magsugod ang prosekusyon sa pagpresentar sang iya ebidensya.
Base sa natalana nga schedule sang ICC, una nga basahon sang Pre-Trial Chamber I ang mga panumbungon nga ginpasaka batuk sa anay Presidente.
Indi na personal nga magtambong si Duterte matapos ginhatagan sang korte ang request sini nga i-waive ang iya personal nga pagtambong sa hearing.
Pagkatapos mabasa ang mga kaso, ang mga piskal sang ICC, lakip ang mga kinaandan nga legal nga mga tiglawas sang mga biktima (CLRVs), kag ang grupo sang depensa magapaguwa sang ila mga pahayag sa pagbukas.
Dugang pa, ang masunod nga hearing ang gintalana sa Pebrero 24, Pebrero 26, kag Pebrero 27.
Sa masunod nga mga inadlaw, ginalauman nga magapresentar sang piskalya ang ila mga ebidensya, nga pagasabton sang kampo ni Duterte.
Si Kaufman nagsiling man nga indi niya kinahanglan ang madamo nga input gikan sa anay presidente para sa ila estratehiya sa depensa.
Madumduman nga ginpasakaan sang kaso sang ICC Prosecutor si Duterte sang 49 ka kaso nga murder kag attempted murder may kaangtanan sa iya ginpatuman nga ‘war on drugs’. Apang, ang prosekusyon nag-insister nga ang kadamuon sang mga biktima sa sulod sang panahon nga ginasakop sang kaso ginaalegar nga mas madamo.
Base sa record sang gobyerno, ginabanta 6,200 ka mga drug suspects ang napatay sa anti-drug operations sa panahon sang administrasyon ni Duterte. Apang, suno sa pila ka human rights organizations, mahimo nga maglab-ot sa 30,000 ang kabug-usan nga numero kon ilakip ang ginaalegar wala marekord nga may kaangtanan nga pagpamatay.
Sa pagkumpirma sang pagbista sa mga panumbungon, ang mga hukom magadeterminar kon bala ang prosekusyon may “substansiyal grounds” ukon bastante nga basehan sa pagpadayon sa isa ka full-blown trial.
