MANILA, Philippines – Ginpaabot sang gobyerno sang Pilipinas ang madali nga desisyon sang International Criminal Police Organization “Interpol”, may kaangtanan sa ginpangayo nga pag-isyu sang Red Notice batok kay anay presidential spokesperson Harry Roque.
Suno kay Jonvic Remulla, resulta sang nasambit nga request nga ginpasaka sang Pilipinas sa Interpol sang nagligad nga tuig.
Ang Interpol Red Notice isa ka law enforcement agencies nga may tinutuyo nga pangitaon kag temporaryo nga dakpon ang isa ka indibidwal samtang nagaatubang sang extradition ukon iban pa nga legal nga proseso.
Ginapangita si Roque bangud sa kaso nga may kaangtanan sa human trafficking nga nalakip sa kontrobersyal nga scam hub sa Lucky South 99 sa Porac, Pampanga.
Sa nagligad nga tuig, ginahingyo sang gobyerno sang Pilipinas ang pag-isyu sang Red Notice batok kay Roque pinaagi sa Presidential Anti-Organized Crime Commission “PAOCC”.
Apang ginkanselar man sang Department of Foreign Affairs “DFA”, ang iya passport sa amo man nga bulan.
Base sa impormasyon, yara subong si Roque sa Austria kag naga-aplay sang asylum bangud sang iya alegasyon nga ginapolitika siya sang administrasyon.
Nahibaluan nga nagtinguha man si Roque nga mangayo sang asylum sa Netherlands, apang ginrefer siya sa Austria suno sa European Union Dublin Regulation nga nagasiling ang una nga miyembro nga pungsod nga ginsudlan sang asylum seeker amo ang responsable sa pagproseso sang aplikasyon sini.
